Хитой суперлигасида тўп сураётган Ўзбекистон миллий терма жамоаси аъзоси Анзур Исмоилов ва яна бир ўзбекистонлик Азиз Ибрагимов 17-тур доирасида майдонга тушишди. Чин ўлкасида ҳаракат қилаётган миллий терма жамоага аъзо яна бир футболчи Камолиддин Тожиев жароҳати сабаб бу турни ҳам ўтказиб юборди.

Хитойдаги легионер футболчилардан Камолиддин Тожиев энг яхши кўрсаткич қайд этиб, ўз жамоаси билан Супер лиганинг 2-пағонасида бормоқда. «Жиангсу Саинти» клуби кеча «Ханджоу» клуби меҳмони бўлиб, 2:1 ҳисобида устун келди. Юқорида таъкидлаб ўтилганидек, Камолиддин Тожиев жароҳати сабаб бу ўйинни ўтказиб юборди. Қайд этиш керак, «Жиангсу Саинти» клуби пешқадам «Гуанжоу»дан 4 очко ортда бормоқда. Клуб навбатдаги турни 22 июль куни 10-ўринда бораётган «Тианжин Теда»га қарши ўтказади.

Азиз Ибрагимов ҳаракат қилаётган «Циндао Жонун» клуби 17-турда айнан «Тианжин Теда» меҳмони бўлиб, 0:0 ҳисобига имзо чекди. Қўлга киритилган 1 очко Азиз Ибрагимов ва унинг жамоадошларига катта фойда бермади. «Циндао Жонун» 16та клуб иштирок этадиган Супер лигада 15-ўринда бормоқда. Championat.uz маълумотига кўра, Азиз Ибрагимов 17-турни асосий таркибда бошлаб, 80-дақиқада ўз ўрини бошқа футболчига бўшатиб берган.

Ва ниҳоят Хитойдаги учинчи легионер футболчи – Анзур Исмоилов 17-турни тўлиқ ўтказди. Бироқ бу унинг жамоаси «Чанчун Ятай»га фойда бермади. Турнир жадвалида ўзидан паст пағонада бораётган «Шандон Лунен»га қарши саф тортган Исмоилов ва унинг жамоадошлари 0:3 ҳисобида имкониятни бой беришди. 17-турдан кейин «Чанчун Ятай» 25 очко билан 6-ўринда бормоқда. Жамоа кейинги учрашувни Дидье Дрогба ва Николья Анелька тўп сураётган «Шанхай Шенхуа» клубига қарши Хитой футбол ассоциацияси Кубоги доирасида ўтказади. Маълумот ўрнида айтиш керакки, шанхайликлар турнир жадвалида бор йўғи 13-ўринни эгаллаб туришибди.