19 ёшгача бўлган футболчи қизлар ўртасидаги Осиё чемпионати саралашининг иккинчи босқич ўйинлари бўлиб ўтадиган санага ойдинлик киритилди. Унга кўра саралашнинг иккинчи босқичи шу йилнинг 1-9 декабрь кунлари Вьетнамда бўлиб ўтади.

Қайд этиш керак, Ўзбекистон U19 қизлар терма жамоаси 20-24 октябрь кунлари Малайзияда бўлиб ўтадиган биринчи саралаш босқичининг «А» гуруҳида Ҳиндистон, Бангладеш ва Қирғизистон терма жамоаларига қарши кураш олиб боради.

Иккинчи саралаш босқичида жами 8та мамлакат терма жамоаси иштирок этади. «А» гуруҳида Таиланд, «В» гуруҳида мезбон Вьетнам терма жамоаси қолган рақибларни кутиб турибди. Регламентга кўра ҳар бир гуруҳда 4тадан терма жамоа ғолиблик учун кураш олиб боради ва 9 декабрь куни икки гуруҳ ғолиби ўзаро учинчи саралаш босқичига йўл олиш учун плей-офф ўйинида иштирок этишади. Ольга Ким бошқарувидаги Ўзбекистон U19 қизлар терма жамоаси Вьетнамдаги иккинчи саралаш босқичига етиб бориши учун, юқорида таъкидлаб ўтилгани каби Малайзиядаги биринчи босқични муваффақиятли якунлаши керак бўлади.