Осиё футбол конфедерацияси 2014 йил бўлиб ўтадиган аёллар ўртасидаги Осиё чемпионати ва унинг учун саралаш босқичи регламентини тасдиқлади.

Бунинг учун ОФК аёллар ўртасидаги Осиё чемпионатида иштирок этиш истагини билдирган мамлакат терма жамоаларини сўнгги – 2010 йилги қитъа чемпионати натижаси асосида рейтингга жойлаштириб чиқди. Рейтингда дастлабки тўрт ўринда қайд этилган Австралия, Япония, Хитой ва Жанубий Корея терма жамоалари саралаш ўйинларисиз Осиё чемпионатига йўл олишади. Қолган 17 мамлакат эса 4та гуруҳга тақсимланади.

Саралаш ўйинларидаги 4та гурҳни 1-ўринда якунлаган терма жамоалар Осиё чемпионатига йўл олишади ва қитъа биринчилигининг финал босқичида жами 8та терма жамоа иштирок этади. Мазкур саккизталик 4тадан 2та гуруҳга тақсимланади. Гуруҳда дастлабки икки ўринни эгаллаган жамоалар ярим финалга йўл олишади.

2015 йил Канада мезбонлик қиладиган аёллар ўртасидаги жаҳон чемпионатида Осиё қитъасидан 5та мамлакат иштирок этади. Осиё чемпионати якунига кўра энг яхши 5та кўрсаткич қайд этган мамлакат Канада мундиалига йўлланмани қўлга киритади. Қайд этиш керак, Япония аёллар терма жамоаси сўнгги жаҳон чемпиони ҳисобланади.

Қуйида ОФКнинг аёллар терма жамоалари рейтинги билан танишиб олишингиз мумкин. Қуръа маросими, саралаш ўйинлари санаси ҳақида кейинроқ маълумот берилади. 

1. Австралия
2. Япония
3. Хитой
4. Жанубий Корея
5. таиланд
6. Мьянма
7. Вьетнам
8. Ўзбекистон
9. Иордания
10. Гонконг
11. Хитой Тайпейи
12. Эрон
13. Қирғизистон
14. Фаластин
*15-21 Баҳрайн
15-21 Бангладеш
15-21 Индонезия
15-21 Ҳиндистон
15-21 Кувайт
15-21 Ливан
15-21 Филиппин