Осиё футбол конфедерацияси 2014 йилдан бошлаб футзал клублари ўртасидаги қитъа чемпионати форматига ўзгартириш киритади. Бу ҳақда иштирокчи мамлакат футбол федерациялари ташкилот томонидан хабардор қилинди.

Эски регламентга кўра Осиё чемпионатида дастлабки учта ўринни қўлга киритган мамлакат жамоалари келаси йилги турнирга саралаш ўйинларисиз йўл олишарди. 2014 йилдан эътиборан эса фақатгина амалдаги чемпион ва мусобақа мезбони саралашдан озод этилади.

2012 йил Кувайт мезбонлик қилган қитъа чемпионатида Тошкентнинг «Ардус» клуби финалга қадар етиб бориб, иккинчи ўринни қўлга киритганди. «Ардус»дан ташқари чемпион — Эроннинг «Санае Гити» ва учинчи ўринни қўлга киритган Япониянинг «Нагоя Оушенс» клублари ўз мамлакатларининг келгуси чемпионини 2013 йилги Осиё чемпионати саралашидан озод этишган.

ОФК 2013 йилги клублар ўртасидаги Осиё чемпионатида Австралия, Хитой, Индонезия, Эрон, Ироқ, Япония, Жанубий Корея, Кувайт, Қирғизистон, Ливан, Мьянма, Филиппин, Қатар, Таиланд, БАА, Ўзбекистон ва Вьетнам чемпионлари иштирок этишини маълум қилди. Юқорида таъкидлангани каби, мазкур мамлакатлардан Эрон, Ўзбекистон ва Япония чемпионлари қитъа чемпионатига тўғридан-тўғри йўл олишади. Шунингдек 2013 йилги қитъа чемпионати мезбони ҳам саралашда қатнашмайди.