Украина Премьер-лигасининг 5-тури доирасида ўзбекистонлик футболчилардан Максим Шацких майдонга тушган бўлса, Виталий Денисов заҳира ўриндиғида қолдирилди.

11 август куни «Днепр» 5-тур доирасида дастлабки 4та учрашувнинг барчасида мағлуб бўлган «Говерла»ни қабул қилиб, 4:1 ҳисобида зафар қучди. Виталий Денисов учрашув қайдномасига киритилган бўлсада, у қадар кучли бўлмаган рақибга қарши майдонга туширилмади.

Ўтган ҳафта Европа лигасини аламли тарзда тарк этган Киевнинг «Арсенал» клуби 5-турни минимал ҳисобдаги ғалаба билан якунлади. Дастлабки 4та турнинг бирортасида ҳам мағлуб бўлмаган Харьковнинг «Металлист» клубига қарши сафарда саф тортган «тўпчилар» Александр Ковпакнинг 12-дақиқада киритган ягона голи эвазига зафар қучишди. Қайд этиш керак, мазкур голга Максим Шацких ассисентлик қилди.

Украина Премьер-лигасини 5тадан ўйинда ғалаба қозонган «Шахтёр» ва «Динамо» клублари бошқариб туришибди. Кучли учликни Виталий Денисов ҳаракат қиладиган «Днепр» якунлаган. Кечаги ғалаба Максим Шацких жамоадошларини турнир жадвалида 8-ўринга олиб чиқди.

Украина миллий чемпионатида навбатдаги тур ўйинлари 18 август куни бўлиб ўтади. Унда «Арсенал» Киевда «Ильичевец»ни қабул қилса, «Днепр» 5-ўринни эгаллаб турган «Кривбасс» меҳмони бўлади.

Қайд этиш керак, Максим Шацких ва Виталий Денисов Ўзбекистон миллий терма жамоасининг Иорданияга қарши ўйинига жалб этилмаган.