Ўзбекистон миллий терма жамоасига номзод тўрт нафар футболчи тўп сураётган Қозоғистон Премьер-лигасида 16-тур беллашувлари старт олди ва унда ўзбекистонлик футбол мухлислари учун аҳамиятли бўлган икки клуб ўз ҳисобига уч очко ёзиб қўйди.

Турнир жадвалида иккинчи ўринни эгаллаб турган «Иртиш» ўртамиёна клублардан бири - «Атирау» меҳмони бўлиб, 2:0 ҳисобида зафар қучди. Унда 90 дақиқа ҳаракат қилган Улуғбек Бақоев 62-дақиқада жамоасининг иккинчи голига муаллифлик қилди. Мазкур ғалаба «Иртиш»ни турнир жадвалида 1-ўринга олиб чиқиши ҳам мумкин эди. Бироқ Улуғбек Бақоев жамоадошларини 1 очкога ортда қолдираётган «Тобол» ҳам 16-турни ғалаба билан якунлаб, 1 очколик фарқни сақлаб қолди.

Куннинг иккинчи ўйинида бир йўла тўрт нафар ўзбекистонлик футболчи тўп сураётган «Актобе» «Тараз» клубини йирик ҳисобда мағлуб этди – 4:1. Қайд этиш керак, бунга қадар «Тараз» турнир жадвалида кучли учликни якунлаб турганди. Кечаги ғалаба эса «Актобе»ни 6-ўринга олиб чиқди. Ўзбекистон миллий терма жамоаси аъзоларидан фақатгина Тимур Кападзе майдонга тушиб, 20-дақиқада ҳисобни тенглаштирувчи голга муаллифлик қилди. Марат Бикмаев ўтган ўйинда орттириб олган қизил карточкаси эвазига қайдномага киритилмаган бўлса, Александр Гейнрих ўзини бетоб ҳис қилган.

16-турдан кейин 6та гол урган Улуғбек Бақоев тўпурарлар пойгасида 6-ўринда бормоқда. Кападзе ҳозирга қадар икки, Гейнрих эса 1та голга муаллифлик қилган.