Ўзбекистон миллий терма жамоаси сардори Сервер Жепаров ҳаракат қиладиган Саудия Арабистонининг «Ал-Шабаб» клуби мамлакат Профессионал лигасининг янги мавсумини йирик ғалаба билан бошлади.
Мавсумнинг 1-турида «Нажрон» клубини қабул қилган «Ал-Шабаб» 4:0 ҳисобида муваффақият қозонди. Ўтган мавсумда Сервер Жепаров тўп сурган 10-рақамни олган бразилиялик футболчи Марсело Рамиро Камачо дубл қайд этган бўлса, Наиф Ал-Қоди ва Абдулмажид Ал-Рушаили каби футболчилар ўз ҳисобларига 1тадан гол ёзиб қўйишди.
Ўзининг 10-рақамини Камачога бериб, 9-рақамда тўп сураётган Сервер Жепаров учрашувнинг 68-дақиқасида айнан бразилиялик ҳужумчининг ўрнига майдонга тушди. Бу вақтга келиб «Ал-Шабаб» 3:0 ҳисобида олдинда бораётганди.
Қайд этиш керак, 1-турдан кейин «Ал-Шабаб» тўплар нисбатига кўра 2-ўринни эгаллаб турибди. Боиси «Ал-Аҳли» илк турни 5:0 ҳисобидаги ғалаба билан бошлади. Шу билан «Ал-Шабаб» 8 август куни «Ал-Файсали» меҳмони бўлади.
