15 август куни Ўзбекистон ва Иордания терма жамоалари ўртасидаги иккинчи ўртоқлик учрашуви бўлиб ўтди. 13 август куни ўтказилган ўйиндан фарқли ўлароқ, учрашув Иордания терма жамоаси ғалабаси билан якунига етди.

Иордания пойтахти – Амман шаҳридаги «Қирол Абдулла» стадионида ўтказилган Иордания ҳамда Ўзбекистон терма жамоалари ўртасидаги халқаро ўртоқлик учрашуви 2:0 ҳисобида майдон эгалари ғалабаси билан якунига етди. Учрашувнинг биринчи бўлимида ҳисоб очилмаган бўлса-да, иккинчи таймда иорданиялик Аҳмад Ҳайёл ҳамда Ҳасан Абдул Фаттоҳ ўз номини таблога ёздириб қўйди.

Ўйин давомида, айниқса, иорданияликлар ҳисобда олдинга ўтиб олишганидан сўнг Миржалол Қосимов қўл остидаги Ўзбекистон миллий терма жамоасидан кўплаб қулай имокниятлар бўлди, бироқ 2:0 ҳисоби ўйин якунига қадар ўзгармади.

Икки кун аввал, 13 август куни бўлиб ўтган учрашувда Ўзбекистон терма жамоаси ғалаба қозонган эди. Ўшанда ўйиннинг иккинчи бўлимида Темур Кападзе томонидан киритилган ягона гол ўзбекистонлик футболчиларга муваффақият келтирганди.

Қайд этиш жоиз, Иордания терма жамоаси ўз тарихида биринчи марта Ўзбекистонни мағлуб этишга муваффақ бўлди. 2001 йилнинг апрелидан 2012 йилнинг 15 август санасига қадар ҳар иккала терма жамоа ўртасида 6та ўйин ўтказилган бўлиб, уларнинг тенг ярмида Ўзбекистон ғалаба қозонган бўлса, яна шунча баҳс дуранг натижалар билан якунига етган эди.

Эслатиб ўтамиз, 13 ва 15 август куни ўтказилган ўртоқлик учрашувлари ҳар икки терма жамоа учун ЖЧ-2014 саралаш 4-босқич баҳсларининг навбатдаги ўйинлари олдидан тайёргарлик вазифасини ўтайди. Ўзбекистон терма жамоаси 11 сентябрь куни Жанубий Кореяга қарши расмий ўйин олдидан 7 сентябрь куни Тошкентда Кувайт терма жамоасига қарши ўртоқлик учрашувида майдонга тушади.