Ўзбекистон футбол Федерациясининг президенти Мираброр Усмонов 24 январь куни Қатар пойтахти Доҳага маҳаллий вақт билан 14:15да Тошкент-Дубай-Доҳа авиа йўналиши орқали етиб келди. Доҳага ташриф буюргач, ЎФФ президенти «Ritz Carlton» меҳмонхонасида жойлашди. Шу тариқа, Мираброр Усмонов, бугун бўлиб ўтадиган Осиё Кубогининг Ўзбекистон ҳамда Австралия ўртасидаги ярим финал учрашувини “Ҳалифа” ўйингоҳида тамоша қиладиган бўлди.
Федерация раҳбари шунингдек, миллий терма жамоа бош мураббийи Вадим Абрамов, жамоа менеджери Асқар Толипжонов ҳамда жамоа техник директори Рустам Акрамовлар билан учрашди. Учрашув давомида Мираброр Усмонов Вадим Абрамовдан футболчиларнинг соғлиги, жамоадаги мухит ва Австралия терма жамоасига қандай тайёргарлик кўрилганлиги тўғрисида сўраб ўтди.
Эслатиб ўтамиз, ЎФФ раҳбари Осиё Кубоги 2011 мусобақаларининг очилиш маросимида ҳам қатнашган эди ва ўшанда Ўзбекистон терма жамоаси Қатар устидан ишончли ғалабага эришгандан сўнг, Усмонов терма жамоамиз азоларига қуйидаги тилакларни билдирган эди: “Кеча сизлар барчамизни ҳурсанд қилишга мувоффақ бўлдинглар. Бу нарса учун ҳаммангизга миннатдорчилигимни билдирмоқчиман. Шу кунларда мен Ўзбекистонга қайтиб кетаман, аммо мен 25 январ куни Қатарга, сизлар иштирок этадиган ярим финал учрашувига ҳам ташриф буюрмоқчиман. Ярим финал иштирокчилари қаторига қўйилиш сизларга албатта насиб қилсин”.
