Ўзбек футболининг 100 йиллик юбилейи ва 27 июнь – матбуот ва ОАВ куни муносабати билан Ўзбекистон футбол федерацияси журналистлар ўртасида футбол турнири ўтказади. Анъанавий тус олаётган мусобақа 20 июнь куни старт олиб, 26 июнга қадар давом этади.
Роппа-роса бир йил аввал ташкил этилган турнирда 16та ОАВ иштирок этганди. Регламентга кўра жамоалар кўр-кўрона қуръада 4та гуруҳга ажратилган. Гуруҳларда биринчи ўринни эгаллаган жамоалар ўзаро «А» зонасида чемпионлик учун кураш олиб борган. Ўз навбатида кейинги ўринлардан жой олган жамоалар ҳам турнирни шунчаки тарк этиб кетмай, мос равишда қўшни гуруҳдаги шу ўрин эгалари билан алоҳида «В», «С» ва «D» зоналарини ташкил қилишган.
Жорий йилги мусобақа регламенти ва иштирокчилари яқин кунлар ичида ҳал бўлади. Унда асосан бир йил аввалги турнирда иштирок этган оммавий ахборот воситаларининг қатнашиши кўзда тутилган.
Қайд этиш керак, мамлакатда оммавий футболга катта эътибор бериш борасидаги ҳукумат қароридан сўнг, бу каби футбол турнирлари ҳар йили турли ҳил касб вакиллари ўртасида ўтказиб келинмоқда.
