Тошкентнинг «Ардус» клуби бош мураббийи Александр Петров «Нагоя Оушенс» устидан қозонилган ғалаба учун шогирдларига миннатдорчилик билдирди.
Футзал бўйича клублар ўртасидаги Осиё чемпионати финал босқичи 1-турида Тошкентнинг «Ардус» клуби мусобақанинг амалдаги ғолиби, Япониянинг «Нагоя Оушенс» клуби устидан 4:3 ҳисобида ғалаба қозонди. Петровнинг қайд этишича, ушбу ғалаба осонликча қўлга киритилгани йўқ.
«Бугун биз Осиёнинг энг кучли жамоаларидан бирига қарши яхши ўйин кўрсата олдик. Йигитлар керакли вақтда бирлаша олиб, характер кўрсата олганликлари учун уларга миннатдорчилик билдираман. Ўйин бошида ўтказиб юборганимиз жуда ҳам тезкор голдан кейин руҳан тикланиб олиш жамоамиз учун осон бўлгани йўқ. Шунга қарамай, танаффусгача мувозанатни тиклаб, танаффусда руҳан тикланиб, охир-оқибат, ўйинда ғалаба қозонишга муваффақ бўлдик», - деди «Ардус» бош мураббийи Александр Петров.
Эслатиб ўтамиз, Кувайтда бўлиб ўтаётган мусобақанинг 2-турида «Ардус» Ливаннинг «Ол Спортс» клубига қарши баҳс олиб боради. Ушбу ўйин 2 июль куни Тошкент вақти билан 14:30да бошланади.
